Interpretation

Do not interprete my silence for hurt.

It's just another way of

loving you,

Without you involved!

~The Poetry Tales

Thank you !

A part of me

Is experiencing

a million Deaths

and

a billion Rebirths,

Both

at the same moment.

Thank you,

For 

Being the reason 

for 

my beautiful Deaths

and

my Transcendental Rebirths..

Thank you,

For

Preparing me

For 

the infinite journey...

And I trust the process! 

-The Poetry Tales

અભિશાપ....

તને ખૂબ ચાહું છું..

પણ શાપિત છે મારો પ્રેમ,

આદિકાળથી.....

અનંત જન્મો સુધી તને ચાહતા રહેવાનો

અને

તને અનંત ઝખમો આપતા રહેવાનો શાપ છે મારે માથે…

તને આલિંગુ અને તીક્ષ્ણ નહોર ફૂટી નીકળે છે મારા પંજાઓને..

ઉઝરડા પાડી બેસું તારા મન પર...

તને ચૂંબન કરવા ધારું અને

ડ્રેક્યુલાના દાંત ઉગી નીકળે મને..

લોહી નિંગળતા તારા સ્વપ્નો ને જોયા કરું

તારી નિર્દોષ આંખોમાં..

ને તારી આંખો..

જોયા કરે છે મને..

એજ ભાવ થી ..એજ ભક્તિ થી...

એજ પ્રેમ થી... એજ તરસ થી...

જોયા કરે છે મને,

તારી એજ સ્વપ્ન-સભર આંખો...

તું તારા અભિશાપની વારતા માંડે છે...

પીડાની આરપાર નીકળીને જ પ્રેમ-પ્રાપ્તિ નો અભિશાપ....

અભિશાપિત છે આપણો પ્રેમ..

પીડાને તાંતણે બંધાયેલા રહેવું

એજ

આપણી નિયતિ....


- The Poetry Tales

ચકલી ઉડે ફુરરરર.....

એક ચકલા અને એક ચકલીને એક દિવસ અચાનક મળવાનું થયું.

ચકલીને જોતાંજ ચકલાના કાનમાં તો બૉલીવુડ રૉમ-કોમના ગીતો ગુંજવા લાગ્યા..

ચકલાની તો જાણે આખી દુનિયા સ્લૉ-મોશનમાં ચાલી ગઈ...

ચકલીએ પણ તો પોતાની પાંખો વીંઝીને ઈશારો આપ્યોજ હતો ને;

એટલે ચકલાથી તો રહેવાયું જ નહિં..

એણે તો કહી દીધું ચકલીને “ચીં..ચીં..(આઈ લવ યુ )”

થોડા સમય બાદ ભલે, પણ ચકલીએ જવાબ દીધો “ચું..ચું.. (મી ટુ !)”

ચકલો તો ભઈ રાજીનો રેડ..

પછી એક દિવસ ચકલાએ ચકલીને કહ્યું-

“ચલ આપણે આપણો સંબંધ કમીટ કરીએ “

ચકલીએ પાંખો વીંઝી

આ ઈશારો સમજી ચકલાએ તો પાંખો કાપી;

પોતાની અને ચકલીની પણ...

થોડા દિવસો પછી પાંખો વધી એટલે ફરીથી ટ્રીમ કરી..

ચકલો તો પ્રેમ કરતો રહ્યો અને પાંખો ટ્રીમ કરતો રહ્યો...

અને ઉડવાનું ભૂલતો રહ્યો....

પણ પાંખ એટલે ઉગવાનું નામ,

અને ઉડવાનું નામ....

એક દિવસ ચકલી કહે “ ચલ આપણે ચકલી ઉડે ફુરરરર રમીયે”

જસ્ટ ફોર અ ચેન્જ આ રમત રમી શકાય એટલે ચકલાએ હા પાડી.

ચકલી બોલી “ ચકલો ઉડે? “

ચકલો કહે “ના ઉડે..”

ચકલો બોલ્યો “ ચકલી ઉડે?”

ને

ચકલી ઉડી ગઈ..ફુરરરર.....

- The Poetry Tales

મર્સી કિલીંગ....

કૉમામાં સરી પડેલો આપણો સંબંધ... 

ક્યાં સુધી જીવાડશું એના પળેપળ ક્ષીણ થતા જતાં સ્વરૂપને? 

 એના દયા-મૃત્યુ માટેની મારી અરજી 

હવે તો સ્વીકારી લે ! 

 - The Poetry Tales

ચાહત...

હું ચાહું છું 

તને 

અને 

મને ચાહી શકવાની તારી 

અસમર્થતાને પણ ! 

-The Poetry Tales

વિષાદ...

મને ગમે છે, મારો વિષાદ... 

અવારનવાર પ્રેમમાં પડું છું

અને એ રીતે 

આવકાર આપ્યા કરું છું, મારા વિષાદને ! 

બસ, 

પછી એને આત્મસમર્પણ કરું છું... 

એ પણ મને સ્વીકારે છે 

(કોઈ તો છે, જે સ્વીકારે છે મને.. અને, કોઈકને તો હું સમર્પિત થઈ શકું છું, પૂર્ણપણે !!) 

 હું એને માણ્યાં કરું છું, 

એ આલિંગે છે મને કસોકસ... 

મારું અસ્તિત્વ હાંફી જાય ત્યાં સુધી... 

મને મજા આવે છે, 

જ્યારે એ ઉતરડી નાંખે છે 

મારા આત્માને,

પોતાના અદ્રશ્ય નખો વડે 

(જે મને કો'ક પ્રેયસીના સ્પર્શથીયે વધુ રેશમી લાગે છે)

અને જલાવી દે છે 

પોતાની અગનજ્વાળામાં 

મારી અમરત્વ પામેલી ઈચ્છાઓને પણ ! 

 મને ગમે છે, મારો વિષાદ... 

એટલે જ તો ફરી નવા પ્રેમની શોધમાં છું, આજકાલ ! 

- The Poetry Tales

 *********************** My friend JT, a Translator by profession and a great soul, took pain to translate વિષાદ in Hindi on my request. It can be enjoyed here :विषाद

મન....

હજી હાલ જ એને નિચોવી, માંડ કોરું કરી તડકે સુકાવા મુક્યું'તું..... ને આ કોના નામનો વરસાદ ફરી ભીંજવી રહ્યો છે, મારા મનને? 

-The Poetry Tales

તારું નામ દઉં

શ્રદ્ધા ફળે જો એને તારું નામ દઉં,

ખુદા મળે જો એને તારું નામ દઉં.

કોરા-કટ કાગળમાં સૂકાભઠ શબ્દો,

લાગણી સળવળે જો એને તારું નામ દઉં.

દિલને થીજવતી આ ઠંડી શૂન્યતા,

બરફ ઓગળે જો એને તારું નામ દઉં.

હવે આ આગમાં કશુંયે ના હોમશો,

ભડકે બળે જો એને તારું નામ દઉં।

-The Poetry Tales

એટલે....

• તારી યાદ એટલે સવારે મારા ઓરડામાં વેર વિખેર કાગળના ડૂચાઓમાં ડૂસકાં ભરતી કવિતા.
• સૂર્ય એટલે પોતાનીજ આગમાં સળગ્યા કરતું કો’ક અન્ય પણ છે એવી સાંત્વના

        -The Poetry Tales

કલંક

મારા ગર્ભના પોલાણમાં પ્રસરી રહ્યું છે વેરાન રણ લીલાછમ્મ થવા મથતાં મારા સ્ત્રીત્વને નિર્મૂળ કરી દે છે એનો ભૂખાળવો ઝંઝાવાત પણ મને તો ગમે છે ભૂરાંભમ્મર ઝાંઝવા અને પ્રસવની પીડા પણ એથી જ અવતારું છું રોજ એકાદ-બે ઝાંઝવાં કલંકોને ધોતી રહું છું એ રીતે...

-The Poetry Tales

શોધ

વરસાદમાં ઝબકોળાયેલા શહેરની વચ્ચે ઊભો છું હું-- કોરોકટ્.... મારા હિસ્સાનું આકાશ તો પોતાની પાંખોમાં સમેટીને લઈ ગયું છે કોઈ પંખી. હથેળીમાં થીજેલું વાદળ લઈ હું ભટક્યા કરું છું હવે મારા હિસ્સાના સૂર્યને શોધવા...

-The Poetry Tales

સંબંધ

સંબંધની બટકણી ડાળ પરથી ખરતાં રહ્યાં મારાં સપનાઓ એક પછી એક... હવે થાક લાગે છે નવા ફળદ્રુપ પ્રદેશની શોધમાં ભટકવાનો...

-The Poetry Tales

સવાર

સવાર એટલે તકિયાને તકિયા તરીકે સ્વીકારી લેવાનો સમય...

-The Poetry Tales

સંહાર.....

રાતનો આસવ ઘોળી ચકચૂર, અલ્લડ, બેફામ.. મારી પાંપણોનાં દ્વાર તોડી અતિક્રમે તારી સ્મૃતિ- સંહાર એની પ્રકૃતિ સુંવાળા સ્વપ્નોનો સ્વાંગ રચી મને ભરમાવે ને પછી પોતાના વિકરાળ પંજાથી મને ચૂંથ્યા કરે રાત આખી- આખરે જંગ જીતે ને મારા અસ્તિત્વના પરાજિત ગઢ પર લહેરાવે વિજય-પતાકા સવારે હું શ્વેત ચાદરમાંથી સમેટું મારી સ્વસ્થતાના કણસતાં ટુકડાઓ...

-The Poetry Tales

મૌન

તારા મૌનનો પહાડ લાંઘું એટલો વધે ...

-The Poetry Tales

મોતી...

તારી નફરતના અતલ દરિયામાં ગોતા મારી, જો ! હું સમજણનું મોતી ગોતી લાવ્યો ...

-The Poetry Tales

છેવટે...

વાસ્તવિકતાના કાળમીંઢ પાષાણો અને મારા સ્વપ્ન સાગરના ઉન્મુક્ત મોજાંઓ... છેવટે તો નર્યાં ફીણ ...

-The Poetry Tales

મારો પરિવાર..

મારો પરિવાર એટલે સાંજ... દરિયો... રેતી... ઉદાસી... અને હું...

-The Poetry Tales

તરસ..

મારી જીવલેણ તરસની ચરમસીમા અને તારા પ્રતિભાવનું એક બુંદ.... જાણે આખું જીવન તર-બતર !

-The Poetry Tales

યુદ્ધ..

કાળી રાતની યુદ્ધ-ભૂમિ પર 

તારા સ્વપ્નોની સેનાએ મારી નિઃશસ્ત્ર ઊંઘ પર હલ્લો કર્યો.. 

મારી ઊંઘનું સામ્રાજ્ય તહસ-નહસ... 

ને તારી યાદની કાળ-કોટડીમાં 

હું બંદીવાન સમ્રાટ...

-The Poetry Tales